தென்னிந்தியாவில் குறிப்பாகத் தமிழகத்தில் மிக அற்புதமான செப்புத் திருமேனிகள் தெய்வங்களின் மீது கொண்ட பக்திப் பெருக்கால் பல்லாயிரக்கணக்கில் வடிக்கப்பட்டு இன்று உலகளாவிய பெருமைமிக்க கலைப் பொருள்களாக விளங்குவதை நாம் அறிவோம். இத்தெய்வத் திருமேனிகளைக் கொடையளித்த கொடையாளர்கள் மிகப் பக்திப் பணிவுடன் அளித்தமையால் அவை எல்லாம் யார் யாரால் கொடுக்கப்பட்டவை என்பதை நாம் அறிந்து கொள்ளக் கூடியதாக இல்லை. எனினும் மிக சில செப்புத் திருமேனிகளின் பீடங்களில் அவற்றின் பெயர், கொடடையளித்தவர், கொடை பற்றிய செய்திகள், உருவாக்கிய கலைஞரின் பெயர், காலம் முதலியவை காணப்படுகின்றன.

எடுத்துக்காட்டாக, நாகப்பட்டினம் மாவட்டம் கரைவீரம் என்ற ஊரில் நின்ற நிலையில் வடிக்கப்பட்ட சிவபிரானின் தேவியாகிய உமா படாரகியின் செப்புத் திருமேனியின் பீடத்தில் உள்ள கல்வெட்டினைக் குறிப்பிடலாம். ‘மதுரை கொண்ட பரகேசரி’ என்ற சிறப்புப் பெயருடைய பராந்தக சோழனின் ஆட்சிக் காலத்தில் (கி.பி. 907-955) பிரம்ம ஸ்ரீ கொங்கர் என்பவருக்காக இந்த உமா படாரகி திருமேனி வடிக்கப்பட்டமையை அக்கல்வெட்டு குறிப்பிடுகிறது.